पुणे : विश्व संवाद केंद्र आणि डेक्कन एज्युकेशन सोसायटी यांच्या संयुक्त विद्यमाने दर वर्षी देण्यात येणाऱ्या आद्य पत्रकार देवर्षी नारद पत्रकारिता पुरस्काराचे वितरण शनिवारी (ता. २०) भारतीय जनता पक्षाचे राष्ट्रीय प्रवक्ते संबित पात्रा यांच्या हस्ते एका विशेष समारंभात करण्यात येणार आहे. हा कार्यक्रम शनिवारी, २० जुलै रोजी सकाळी १०.३० वाजता फर्ग्युसन कॉलेजच्या अॅम्फी थिएटरमध्ये होणार आहे.
‘या पुरस्कार उपक्रमाचे हे नववे वर्ष असून, देवर्षी नारद जयंतीच्या निमित्ताने हे पुरस्कार देण्यात येतात. पत्रकारितेत उल्लेखनीय काम करणाऱ्या चार पत्रकारांचा पुरस्कार देऊन गौरव करण्यात येतो. यंदा ज्येष्ठ पत्रकार पुरस्कारासाठी ‘आज का आनंद’ समूहाचे संस्थापक श्याम अगरवाल यांची, युवा पत्रकार पुरस्कारासाठी दै. दिव्य मराठी सोलापूरचे सिद्धराम पाटील, व्यंगचित्रकार पुरस्कारासाठी बारामतीचे शिवाजी गावडे आणि सोशल मीडिया पुरस्कारासाठी पुण्याचे विश्वनाथ गरुड यांची निवड करण्यात आली आहे.
पुरस्काराचे स्वरूप अनुक्रमे १५ हजार रुपये, अन्य तीन पुरस्कार सात हजार ५०० रुपये रोख, स्मृतिचिन्ह, शाल श्रीफळ असे आहे’, अशी माहिती विश्व संवाद केंद्राचे अध्यक्ष मनोहर कुलकर्णी, डी. ई. सोसायटीचे अध्यक्ष डॉ. शरद कुंटे यांनी दिली.
पुरस्कार वितरणाविषयी :
दिवस : शनिवार, २० जुलै २०१९
वेळ : सकाळी १०.३० वाजता
स्थळ : फर्ग्युसन कॉलेजचे अॅम्फी थिएटर, पुणे.